នាថ្ងៃទី២១ និង២២ ខែសីហា ឆ្នាំ២០១៩កន្លងទៅ ក្រុមហ៊ុន ខេមបូឌាន ដេរីវ៉េទីវ អ៊ិចឆេង បានទទួលស្វាគមន៍ទស្សនកិច្ចរយៈពេលពីរថ្ងៃជាប់ៗគ្នារបស់ក្រុមហ៊ុន New World Financial Group នៅការិយាល័យកណ្ដាលរបស់ខ្លួន និងបានផ្ដួចផ្ដើមទស្សនកិច្ចនៅគណៈកម្មការមូលបត្រកម្ពុជាផងដែរ។ អ្នកចូលរួមដំណើរទស្សនកិច្ចនេះរួមមាន៖ លោក Min Htike AUNG នាយកគ្រប់គ្រង លោកស្រី ThinThin KHINE អភិបាល លោក Swam Saung Oo អភិបាល និងលោក Kyaw Zin TUN ប្រធានគ្រប់គ្រងទូទៅ។ គោលបំណងនៃដំណើរទស្សនកិច្ចមួយនេះ គឺដើម្បីផ្លាស់ប្ដូរនូវគំនិត ចែករំលែកនូវបទពិសោធន៍ស្ដីអំពីនិយ័តកម្មនៃទីផ្សារហិរញ្ញវត្ថុ និងស្វែងរកនូវទិសដៅនៃកិច្ចសហប្រតិបត្តិការនាពេលអនាគត។ ភាគីទាំងអស់ សុទ្ធតែបានបង្ហាញនូវការជឿជាក់ថា ដំណើរទស្សនកិច្ចមួយនេះអាចជួយជ្រោមជ្រែង និងគាំទ្រដល់ការរីកចម្រើននៃទីផ្សារឧបករណ៍និស្សន្ទនៅប្រទេសមីយ៉ាន់ម៉ានាពេលអនាគត។
ក្នុងរយៈពេលពីរថ្ងៃនេះ ថ្នាក់ដឹកនាំរបស់ក្រុមហ៊ុន ខេមបូឌាន ដេរីវ៉េទីវ អ៊ិចឆេង បានណែនាំអំពីប្រវត្តិនៃការអភិវឌ្ឍន៍ និងសមិទ្ធិផលសំខាន់ៗដែលសម្រេចបាននៅក្នុងព្រះរាជាណាចក្រកម្ពុជា។ ពួកគាត់ក៏បានចែករំលែកអំពីការវិភាគ និងផ្ដល់យោបល់របស់ពួកគាត់យ៉ាងស៊ីជម្រៅទៅលើស្ថានភាពហិរញ្ញវត្ថុ នៃប្រទេសមីយ៉ាន់ម៉ា ដែលជាអ្វីគួរឱ្យកត់សម្គាល់ និងមានអត្ថប្រយោជន៍ក្នុងការលើកកម្ពស់ការអភិវឌ្ឍន៍ និងកិច្ចសហប្រតិបត្តិការនាពេលអនាគត។ ទន្ទឹមនឹងនេះដែរ ក្រុមហ៊ុន New World Financial Groupបានបង្ហាញក្ដីសោមន្សរីករាយចំពោះការអញ្ជើញដ៏មានតម្លៃរបស់ក្រុមហ៊ុន ខេមបូឌាន ដេរីវ៉េទីវ អ៊ិចឆេង។ ក្នុងរយៈពេលប៉ុន្មានឆ្នាំកន្លងទៅនេះ ក្រុមហ៊ុន ខេមបូឌាន ដេរីវ៉េទីវ អ៊ិចឆេង បានខិតខំប្រឹងប្រែងយ៉ាងខ្លាំងក្នុងការផ្សារភ្ជាប់ប្រទេសកម្ពុជានិងប្រទេសមីយ៉ាន់ម៉ា ក្នុងភារៈកិច្ចជួយជ្រោមជ្រែងនិងគាំទ្រដល់ការអភិវឌ្ឍន៍នៃសេដ្ឋកិច្ចរបស់មីយ៉ាន់ម៉ា ក៏ដូចជាភាពរុងរឿងនៃតំបន់អាស៊ានទាំងមូលនាពេលអនាគត។ ក្រុមហ៊ុន New World Financial Group ក៏ជឿជាក់ថា កិច្ចសហប្រតិបត្តិការជាមួយក្រុមហ៊ុន ខេមបូឌាន ដេរីវ៉េទីវ អ៊ិចឆេង នឹងកាន់តែរឹងមាំមិនអាចបំបែកបាន ហើយនឹងជួយពួកគេអោយឈានដល់យុគសម័យថ្មីនៃទីផ្សារហិរញ្ញវត្ថុ។
ស្ថិតក្នុងតំបន់មួយដែលជាស្នូលនៃគំនិតផ្តួចផ្តើមផ្លូវមួយខ្សែក្រវ៉ាត់មួយ ប្រទេសមីយ៉ាន់ម៉ា គឺជាមជ្ឈមណ្ឌលដ៏សំខាន់សម្រាប់តភ្ជាប់តំបន់អាស៊ីអាគ្នេយ៍ និងមជ្ឈឹមបូព៌ា។ ជាមួយនឹងការរីកចម្រើនជាបន្តបន្ទាប់នៃសេដ្ឋកិច្ចរបស់ប្រទេសមីយ៉ាន់ម៉ា វាពិតជាសំខាន់ណាស់ក្នុងការចាប់យកនូវឱកាសអភិវឌ្ឍន៍ផ្សេងៗ និងស្រូបយកនូវបទពិសោធន៍នៃភាពជោគជ័យកន្លងមក។ តាមរយៈដំណើរទស្សនកិច្ចនេះ ថ្នាក់ដឹកនាំរបស់ក្រុមហ៊ុន ខេមបូឌាន ដេរីវ៉េទីវ អ៊ិចឆេង ក៏បានអបអរសាទរដល់ប្រទេសមីយ៉ាន់ម៉ាដែលមានសក្តានុពលអស្ចារ្យសម្រាប់ការអភិវឌ្ឍ៍សេដ្ឋកិច្ច។ ជាមួយគ្នានេះដែរ ក្រុមហ៊ុន ខេមបូឌាន ដេរីវ៉េទីវ អ៊ិចឆេង ក៏ទន្ទឹងរង់ចាំផ្ដល់នូវការគាំទ្រខ្លាំងក្លាដល់ប្រទេសមីយ៉ាន់ម៉ា ក៏ដូចជាបណ្តាប្រទេសក្នុងតំបន់អាស៊ាន ក្នុងកិច្ចការអភិវឌ្ឍទីផ្សារហិរញ្ញវត្ថុរបស់ពួកគេ ហើយរួមសហការគ្នាដើម្បីសម្រេចបាននូវទីផ្សារហិរញ្ញវត្ថុមួយដែលប្រកបដោយវិជ្ជាជីវៈ ស្ថេរភាព និងភាពច្នៃប្រឌិត។
en
zh
