ក្រុមហ៊ុន ខេមបូឌាន ដេរីវ៉េទីវ អ៊ិចឆេង រួមជាមួយនឹង ក្រុមហ៊ុន សានីស្វីស ឌីស្រ្ទីប៊្យូសិន (ខេមបូឌា) និងក្រុមហ៊ុនជាច្រើនទៀត បានរៀបចំកម្មវិធីសប្បុរសធម៌មួយនៅថ្ងៃទី០៥ ខែឧសភា ឆ្នាំ២០២២ ដើម្បីអបអរសាទរទិវាអនាម័យដៃពិភពលោកឆ្នាំ ២០២២ និងជួយផ្សព្វផ្សាយពីសារៈសំខាន់នៃអនាម័យដៃដល់កុមារនៅអង្គការផ្ទះបាយកុមារ។ សកម្មភាពសប្បាយៗជាច្រើន ត្រូវបានដាក់បញ្ចូលក្នុងកម្មវិធីសប្បុរសធម៌នេះ រួមទាំងការពន្យល់បង្ហាញដោយក្រុមការងាររបស់ ក្រុមហ៊ុន សានីស្វីស ឌីស្រ្ទីប៊្យូសិន (ខេមបូឌា) អំពីរបៀបដែលទឹកលាងដៃអាចកម្ចាត់មេរោគ និងការអនុវត្ត៦ជំហាននៃការសម្អាតអនាម័យដៃផងដែរ។
ជាលទ្ធផល អ្នកចូលរួមក្នុងកម្មវិធី ជាពិសេសកុមារនៅអង្គការផ្ទះបាយកុមារ អាចទទួលបាននូវចំណេះដឹង និងបានសិក្សាស្វែងយល់បន្ថែមអំពីសារៈសំខាន់នៃអនាម័យដៃ ជាមួយនឹងវិធីត្រឹមត្រូវនៃការលាងដៃ ដើម្បីការពារមេរោគដែលមាននៅជុំវិញខ្លួន ជាពិសេសវីរុសកូរ៉ូណា។ មិនត្រឹមតែប៉ុណ្ណោះ កុមារជាច្រើនបានចូលរួមនៅក្នុងកម្មវិធីកម្សាន្តសប្បាយៗជាច្រើន ដូចជា៖ ការរាំលេង ការសម្តែង និងសកម្មភាពពិសោធន៍ដ៏គួរឱ្យរំភើប ដែលបានផ្តល់នូវស្នាមញញឹម និងអារម្មណ៍រីករាយដល់ពួកគាត់។
សានីស្វីស គឺជាក្រុមហ៊ុនដែលមានមូលដ្ឋាននៅប្រទេសស្វីស ដែលធ្វើការយ៉ាងសកម្មលើការផ្តល់នូវផលិតផល និងសេវាកម្មកម្ចាត់មេរោគដែលមានគុណភាពខ្ពស់បំផុត ទៅដល់ជាង ៨០ ប្រទេស រួមទាំងប្រទេសកម្ពុជាកាលពីឆ្នាំមុននេះផងដែរ។ ក្នុងនាមជាសមាជិកនៃអង្គការឯកជនសម្រាប់សុវត្ថិភាពអ្នកជំងឺ (POPS) របស់អង្គការសុខភាពពិភពលោក (WHO) សានីស្វីស តែងតែខិតខំប្រឹងប្រែងក្នុងការផ្តល់នូវផលិតផលសម្លាប់មេរោគដែលគ្មានជាតិអាល់កុល ដើម្បីរួមចំណែកក្នុងការផ្តល់ជូនពិភពលោកនូវបរិស្ថានរស់នៅប្រកបដោយអនាម័យស្អាត និងសុវត្ថិភាព។
en
zh
