នាថ្ងៃទី១១ ខែកុម្ភៈ ឆ្នាំ២០២២ ក្រុមហ៊ុន ខេមបូឌាន ដេរីវ៉េទីវ អ៊ិចឆេង បានឧបត្ថម្ភសម្ភារសម្រាប់ការពារជំងឺកូវីដ-១៩ រួមមាន៖ ទឹកលាងដៃសម្លាប់មេរោគសានីស្វីស (Saniswiss Hand Sanitizers) ចំនួន ១៥០លីត្រ និងម៉ាស់ចំនួន ១២ ៥០០ តាមរយៈនិយ័តករមូលបត្រកម្ពុជា (ន.ម.ក) ដើម្បីគាំទ្រកម្មវិធីសប្បុរសធម៌សម្រាប់សាលារៀនចំនួន ៣៤កន្លែង ដែលស្ថិតនៅក្នុងស្រុកកៀនស្វាយ ខេត្តកណ្តាល ក្នុងគោលបំណងចូលរួមចំណែកទប់ស្កាត់ការរីករាលដាលនៃជំងឺរាតត្បាត និងលើកកម្ពស់សុខុមាលភាពទូទៅ។
ក្នុងកិច្ចខិតខំប្រឹងប្រែងផ្ដល់សម្ភារការពារដល់សិស្សានុសិស្ស និងលោកគ្រូ អ្នកគ្រូ ដើម្បីឱ្យពួកគាត់ទទួលបាននូវសុវត្ថិភាពដ៏ល្អបំផុតនោះ ក្រុមហ៊ុន ខេមបូឌាន ដេរីវ៉េទីវ អ៊ិចឆេង សង្ឃឹមថា ការចែករំលែកបន្ដិចបន្តួចនេះនឹងកើតជាប្រយោជន៍ ក៏ដូចជាអាចជំរុញឱ្យមានស្មារតីចូលរួមបន្ថែមទៀតពីសាធារណជន ពីព្រោះសេចក្តីសុខដ៏ធំធេងនិងយូរអង្វែង គឺផ្ដើមចេញពីសកម្មភាពយកចិត្ដទុកដាក់ចំពោះគ្នាបន្ដិចបន្ដួចនេះឯង ដែលជាគុណតម្លៃស្នូលនៃមនុស្សធម៌ និងទំនួលខុសត្រូវសង្គម។
ក្រុមហ៊ុន ខេមបូឌាន ដេរីវ៉េទីវ អ៊ិចឆេង បានចូលរួមចំណែកក្នុងការការពារការរីករាលដាលនៃជំងឺកូវីដ-១៩ ទាំងនៅក្នុងក្រុមហ៊ុនផ្ទាល់ និងតាមរយៈយុទ្ធនាការប្រយុទ្ធប្រឆាំងខាងក្រៅផងដែរ។ អ្វីដែលសំខាន់នោះគឺ ក្រុមហ៊ុនបានជ្រើសរើសផលិតផល និងវិធីសាស្រ្តល្អបំផុត ដើម្បីប្រាកដថាវានឹងមិនមានផលប៉ះពាល់អវិជ្ជមានណាមួយនៅពេលអនាគត ដែលបណ្ដាលមកពីការអនុវត្តពាក់ព័ន្ធនឹងផ្នែកវេជ្ជសាស្ត្រ។ ជាក់ស្ដែង ក្រុមហ៊ុន ខេមបូឌាន ដេរីវ៉េទីវ អ៊ិចឆេង បានប្រើប្រាស់សេវាកម្មរបស់ក្រុមហ៊ុន សានីស្វីស ឌីស្រ្ទីប្យ៊ូសិន (ខេមបូឌា) ជាប្រចាំដើម្បីសម្លាប់បាក់តេរី មេរោគ និងវីរុសគ្រប់ប្រភេទ រួមទាំងវីរុសកូវីដ-១៩ ផងដែរ ព្រោះថាផលិតផលសានីស្វីសត្រូវបានទទួលស្គាល់ដោយអង្គការសុខភាពពិភពលោក។ ដូច្នេះ ក្រុមហ៊ុន ខេមបូឌាន ដេរីវ៉េទីវ អ៊ិចឆេង មានសោមនស្សក្នុងការប្រើប្រាស់ និងចែករំលែកផលិតផលដែលត្រូវបានណែនាំឱ្យប្រើប្រាស់ជាសកលនេះដល់សិស្សានុសិស្ស និងសហគមន៍ឱ្យអស់ពីលទ្ធភាព ដើម្បីឱ្យការថែរក្សាអនាម័យកាន់តែមានប្រសិទ្ធភាព និងសុវត្ថិភាពខ្ពស់ ទាំងក្នុងពេលបច្ចុប្បន្ន និងពេលអនាគត។
ក្រុមហ៊ុន ខេមបូឌាន ដេរីវ៉េទីវ អ៊ិចឆេង សូមថ្លែងអំណរគុណយ៉ាងជ្រាលជ្រៅចំពោះ ន.ម.ក សម្រាប់ការផ្តួចផ្តើម និងអនុញ្ញាតឱ្យក្រុមហ៊ុនរបស់យើង បានចូលរួមក្នុងយុទ្ធនាការដ៏សំខាន់នេះ ហើយក្រុមហ៊ុនយើងនឹងប្ដេជ្ញាចិត្ដចូលរួមក្នុងសកម្មភាពសប្បុរសធម៌របស់ ន.ម.ក ជាបន្តបន្ទាប់ទៀតនាពេលអនាគត។
en
zh
