នាថ្ងៃទី៣១ ខែមីនា ឆ្នាំ២០២២ ក្រុមហ៊ុន ខេមបូឌាន ដេរីវ៉េទីវ អ៊ិចឆេង មានសោមនស្សរីករាយក្នុងការទទួលស្វាគមន៍ដំណើរទស្សនកិច្ចរបស់ក្រុមហ៊ុន Lukfook Jewellery Cambodia នៅទីស្នាក់ការកណ្តាលរបស់យើង បន្ទាប់ពីយើងបានធ្វើទស្សនកិច្ចនៅហាងគ្រឿងអលង្ការដ៏ល្បីល្បាញមួយនេះកាលពីសប្តាហ៍មុន។ ដំណើរទស្សនកិច្ចទៅវិញទៅមកនេះ បានបង្ហាញអំពីការប្តេជ្ញាក្នុងការផ្សារភ្ជាប់ និងពង្រឹងយុទ្ធសាស្ត្រផែនការអាជីវកម្ម ដើម្បីបន្ថែមអត្ថប្រយោជន៍ដល់អតិថិជនរបស់ភាគីទាំងសងខាង ក៏ដូចជាលើកកម្ពស់ទីផ្សារលោហធាតុមានតម្លៃនៅកម្ពុជាឱ្យកាន់តែល្អប្រសើរផងដែរ។
ដំណើរទស្សនកិច្ចលើកចុងក្រោយនេះ ត្រូវបានផ្ដល់កិត្តិយសដឹកនាំដោយលោកជំទាវ ឆាយ លក្ខិណា អគ្គនាយិកានៃក្រុមហ៊ុន Lukfook Jewellery Cambodia និងត្រូវបានស្វាគមន៍យ៉ាងកក់ក្តៅដោយលោក Lawrence Kook អភិបាល និងនាយកប្រតិបត្តិនៃក្រុមហ៊ុន ខេមបូឌាន ដេរីវ៉េទីវ អ៊ិចឆេង ដែលបង្កើតបាននូវលទ្ធភាពកាន់តែខ្ពស់សម្រាប់ការចុះហត្ថលេខាលើអនុស្សរណៈយោគយល់គ្នារវាងក្រុមហ៊ុនទាំងពីរនាពេលអនាគត ដើម្បីសម្រេចឱ្យបាននូវគោលបំណង ដូចដែលបានរៀបរាប់ខាងដើម។
ក្នុងអំឡុងពេលនៃដំណើរទស្សនកិច្ចនេះ លោកជំទាវ ឆាយ លក្ខិណា បានមានប្រសាសន៍ថា៖ «ខ្ញុំពិតជាសង្ឃឹមថា ដំណើរទស្សនកិច្ចទៅវិញទៅមករវាងក្រុមហ៊ុនទាំងពីរ នឹងក្លាយជាកត្ដាជំរុញមួយយ៉ាងសំខាន់ ដល់គម្រោងសហប្រតិបត្តិការឈ្នះ-ឈ្នះរបស់ក្រុមហ៊ុនយើងនាពេលដ៏ខ្លីខាងមុខនេះ»។
លោក Lawrence Kook ក៏បានលើកឡើងដែរថា៖ «ក្រុមហ៊ុន ខេមបូឌាន ដេរីវ៉េទីវ អ៊ិចឆេង ក៏កំពុងទន្ទឹងរង់ចាំកិច្ចសហការជាមួយក្រុមហ៊ុន Lukfook Jewellery Cambodia ហើយតាមរយៈកិច្ចសហប្រតិបត្តិការនេះ យើងនឹងអាចផ្ដល់នូវអត្ថប្រយោជន៍កាន់តែច្រើនដល់អតិថិជនរបស់យើង ក៏ដូចជាចូលរួមចំណែកដល់ការអភិវឌ្ឍទីផ្សារលោហធាតុមានតម្លៃនៅកម្ពុជា ស្របតាមភាពជោគជ័យរបស់កម្ពុជាដែលមានក្រុមហ៊ុនផលិតមាសលើកដំបូងរបស់ខ្លួននៅក្នុងប្រទេសកាលពីឆ្នាំមុន»។
ជារួម ដំណើរទស្សនកិច្ចលើកនេះ បានបញ្ចប់ទៅដោយភាពសប្បាយរីករាយ ខណៈដែលភាគីទាំងសងខាងបានបង្ហាញពីការកោតសរសើរគ្នាទៅវិញទៅមក និងរំពឹងថា យើងនឹងសម្រេចបាននូវកិច្ចសហប្រតិបត្តិដ៏មានអត្ថន័យមួយឆាប់ៗនេះ ដើម្បីជាភាពល្អប្រសើរនៃវិស័យលោហធាតុមានតម្លៃ។
en
zh
