ក្រុមហ៊ុន ខេមបូឌាន ដេរីវ៉េទីវ អ៊ិចឆេងបានប្រារព្ធខួបគម្រប់ពីរឆ្នាំរបស់ខ្លួននៅថ្ងៃទី 15 ខែកញ្ញា ឆ្នាំ 2018 ក្រោមចំណងជើង “អាណាចក្រនៃអច្ឆរិយជន” នៅសណ្ឋាគារសូហ្វីតែល ភ្នំពេញ ភូគីត្រា ដែលបង្ហាញពីដំណើរដ៏អស្ចារ្យរបស់ខ្លួនក្នុងរយៈប៉ុន្មានឆ្នាំមកនេះ។ “អាណាចក្រនៃអច្ឆរិយជន” បានប្រមូលផ្តុំវិនិយោគិន និងអ្នកជំនាញផ្នែកហិរញ្ញវត្ថុ ក៏ដូចជាតារាល្បីៗមកពីបណ្តាប្រទេសផ្សេងៗគ្នានៅជុំវិញពិភពលោក។ ព្រឹត្ដិការណ៍ដ៏គួរឱ្យកត់សម្គាល់នេះ បានផ្សារភ្ជាប់ការតុបតែងដ៏ស្រស់ស្អាត និងការសម្តែងចម្រុះបញ្ចូលគ្នា ដែលកម្រកើតមានឡើងនៅក្នុងប្រទេសកម្ពុជា។
ដោយគ្រាន់តែឈានមួយជំហានចូលទៅក្នុងបរិវេណនៃពិធីនេះ ភ្ញៀវកិត្តិយសទាំងអស់ទទួលបាននូវអារម្មណ៍រំភើបរួចទៅហើយ ហើយរំពឹងថា ព្រឹត្តិការណ៍នេះ នឹងមានអ្វីៗពិសេសជាច្រើនទៀត បន្ទាប់ពីពួកគេបានមើលឃើញនូវការតុបតែងរចនានៃរូបតំណាងជាតិនៃប្រទេសជាច្រើន ដូចជាកម្ពុជា ចិន អូស្ត្រាលី បារាំង វៀតណាម ឥណ្ឌូណេស៊ី និងជប៉ុន ដែលបង្ហាញសម្រស់ដ៏អស្ចារ្យរបស់ពួកគេ អមដោយតារាបង្ហាញម៉ូតស្រស់ស្អាតនៅក្នុងសំលៀកបំពាក់ប្រពៃណីជាតិផ្សេងៗក្រោមពន្លឺភ្លើងចិញ្ចាចចិញ្ចែង។ បរិយាកាសមួយនេះ បានបង្កើតនូវទស្សនីយភាពមួយ ដែលបង្ហាញពីការតភ្ជាប់គ្នានៃផ្នែកផ្សេងៗនៃពិភពលោក និងឆ្លុះបញ្ចាំងពីការធ្វើសមាហរណកម្ម និងកិច្ចសហប្រតិបត្តិការអន្តរជាតិកាន់តែខ្លាំងឡើង ដូចគ្នានឹងអ្វីដែលក្រុមហ៊ុន ខេមបូឌាន ដេរីវ៉េទីវ អ៊ិចឆេង កំពុងធ្វើដើម្បីបង្កើនដៃគូទាំងក្នុងស្រុក និងក្រៅស្រុក។
“អាណាចក្រនៃអច្ឆរិយជន” បានបើកពិធីជាផ្លូវការជាមួយនឹងរបាំប្រជាប្រិយខ្មែរឈ្មោះ “របាំគោះត្រឡោក” ដើម្បីស្វាគមន៍ និងផ្តល់នូវការកម្សាន្តប្លែកភ្នែកជូនភ្ញៀវកិត្តិយសដែលបានចូលរួម ជាពិសេសភ្ញៀវដែលបានអញ្ជើញមកពីប្រទេសនានាក្រៅពីប្រទេសកម្ពុជា។ បន្ទាប់មក លោក Lawrence Kook ដែលជាអភិបាលនៃក្រុមហ៊ុន ខេមបូឌាន ដេរីវ៉េទីវ អ៊ិចឆេង ត្រូវបានអញ្ជើញអោយឡើងថ្លែងសុន្ទរកថា ដែលរួមមានការស្វាគមន៍ភ្ញៀវកិត្តិយស ការណែនាំអំពីប្រទេសកម្ពុជា និងការបង្ហាញពីកិច្ចខិតខំប្រឹងប្រែង និងសមិទ្ធិផលរបស់ក្រុមហ៊ុនលើទីផ្សារហិរញ្ញវត្ថុ ជាពិសេសទីផ្សារឧបករណ៍និស្សន្ទក្នុងឆ្នាំកន្លងទៅ ដែលក្រុមហ៊ុនបានជម្នះបញ្ហាប្រឈម ហើយបានដឹកនាំទីផ្សារហិរញ្ញវត្ថុក្នុងស្រុកទៅកាន់កម្រិតមួយដែលកាន់តែប្រសើរ។ លោក Lawrence ក៏បានបង្ហាញពីការដឹងគុណយ៉ាងជ្រាលជ្រៅដល់អាជ្ញាធរ ក្រុមហ៊ុនឈ្មួញជើងសាឧបករណ៍និស្សន្ទ ដៃគូអាជីវកម្ម និងបុគ្គលិកសម្រាប់កិច្ចសហប្រតិបត្តិការ និងការរួមចំណែកដ៏ល្អ ដែលជាកម្លាំងចលករជម្រុញការរីកចម្រើននៃទីផ្សារឧបករណ៍និស្សន្ទ។ លោករំពឹងថា វិស័យឧបករណ៍និស្សន្ទនៅកម្ពុជានឹងបន្តរីកចម្រើន ហើយនឹងបម្រើវិស័យជាច្រើនរួមទាំងវិស័យសេដ្ឋកិច្ច និងអប់រំនាពេលខាងមុខ។
ពិធីមួយនេះ កាន់តែមានភាពសប្បាយរីករាយជាមួយនឹងការសម្ដែងរបស់តារាចម្រៀងដ៏ល្បីល្បាញរបស់កម្ពុជា កញ្ញា ឱក សុគន្ធកញ្ញា និងតារាមកពីប្រទេសចិន កញ្ញា Eunice និងកញ្ញា Hana។ ក្នុងនោះដែរ សិល្បៈករមកពីប្រទេសម៉ាឡេស៊ី បានគូរគំនូរខ្សាច់យ៉ាងរស់រវើក ដែលបានបង្ហាញពីកិច្ចសហប្រតិបត្តិការដ៏រឹងមាំរវាងកម្ពុជា និងចិនក៏ដូចជារវាងប្រទេសកម្ពុជា និងប្រទេសជាច្រើនដ៏ទៃទៀត។
ដោយទទួលស្គាល់លើការចូលរួមចំណែករបស់បុគ្គលិកឆ្នើម ក្រុមហ៊ុន ខេមបូឌាន ដេរីវ៉េទីវ អ៊ិចឆេង ក៏បានប្រគល់ពានរង្វាន់ផ្សេងៗគ្នា ដែលធ្វើឱ្យបុគ្គលិកឆ្នើមមានមោទកភាពលើកិច្ចខិតខំប្រឹងប្រែងកន្លងមក និងប្តេជ្ញាចិត្តក្នុងការផ្តល់ជូនអ្វីថ្មីៗបន្ថែមទៀតដល់ក្រុមហ៊ុន។ ចំណែកការចាប់ឆ្នោតផ្សងសំណាងវិញ បានធ្វើឱ្យភ្ញៀវកិត្តិយសទាំងអស់មានអារម្មណ៍រំភើប និងយកចិត្តទុកដាក់ផ្ទៀងផ្ទាត់សន្លឹកឆ្នោតដែលត្រូវរង្វាន់ ដែលរង្វាន់ធំ គឺជាគ្រឿងអលង្ការម៉ាកដ៏មានតម្លៃពីហាងគ្រឿងអលង្ការឡុកហ្វុក។
“អាណាចក្រនៃអច្ឆរិយជន” បានផ្ដល់ភាពសប្បាយរីករាយដល់ភ្ញៀវកិត្តិយសតាំងពីដើមរហូតដល់ការបញ្ចប់នៃពិធី ដោយមានការសម្តែងពីឌីជេ រួមជាមួយនឹងការរាំកម្សាន្តផងដែរ ដែលបន្សល់ទុកនូវអនុស្សាវរីយ៍មិនអាចបំភ្លេចបាន។
en
zh
