នាថ្ងៃទី០១ ខែមេសា ឆ្នាំ២០២២ ក្រុមហ៊ុន ខេមបូឌាន ដេរីវ៉េទីវ អ៊ិចឆេង បានចូលរួមក្នុងកម្មវិធីរាត្រី Non-Farm Payrolls និងការប្រកួតជួញដូរ ដែលត្រូវបានរៀបចំឡើងដោយក្រុមហ៊ុនឈ្មួញជើងសាឧបករណ៍និស្សន្ទរបស់យើង គឺក្រុមហ៊ុន ហ្គោលដេន អេហ្វអិកស៍ លីង ឃែភីថល។ តាមរយៈកម្មវិធីនេះ ក្រុមហ៊ុន ខេមបូឌាន ដេរីវ៉េទីវ អ៊ិចឆេង បានចូលរួមរាល់សកម្មភាពសប្បាយៗ ចែករំលែកបទពិសោធន៍និងចំណេះដឹងផ្នែកហិរញ្ញវត្ថុ ក៏ដូចជាអបអរដល់ម្ចាស់ជ័យលាភីទាំង ៥រូប ដែលទទួលបានប្រាក់រង្វាន់សរុបរហូតដល់ ៣ ០០០ ដុល្លារ។
លោក Lawrence Kook ដែលជាអភិបាល និងជានាយកប្រតិបត្តិនៃក្រុមហ៊ុន ខេមបូឌាន ដេរីវ៉េទីវ អ៊ិចឆេង បានអញ្ជើញចូលរួមជាកិត្តិយស និងបានគូសបញ្ជាក់ថា ទិន្នន័យ Non-Farm Payrolls ដែលជាអត្រាអ្នកមានការងារធ្វើនៅសហរដ្ឋអាមេរិក (លើកលែងតែផ្នែកកសិកម្ម) គឺជាទិន្នន័យសេដ្ឋកិច្ចដ៏សំខាន់មួយ ដែលវិនិយោគិន និងអ្នកជួញដូរក្នុងទីផ្សារហិរញ្ញវត្ថុអន្ដរជាតិទាំងអស់ អាចប្រើប្រាស់ជាសូចនាករដ៏មានប្រសិទ្ធភាព ដើម្បីចាប់យកឱកាសជួញដូរ និងបង្កើតប្រាក់ចំណេញ។
លោកបានបន្ថែមទៀតថា កម្មវិធីរាត្រី Non-Farm Payrolls និងការប្រកួតជួញដូររបស់ក្រុមហ៊ុន ហ្គោលដេន អេហ្វអិកស៍ លីង ឃែភីថល មានគុណសម្បត្តិគួរឱ្យកត់សម្គាល់ ពីព្រោះវាអាចជំរុញអ្នកចូលរួមទាំងអស់ ជាពិសេសបេក្ខជន ឱ្យសិក្សា វិភាគ និងអនុវត្តជំនាញរបស់ពួកគាត់ក្នុងការជួញដូរឧបករណ៍និស្សន្ទ។
លើសពីនេះទៀត កម្មវិធីនេះក៏បានបង្កើតឱកាសដ៏ល្អមួយ ដែលអ្នកចូលរួមទាំងអស់អាចប្រាស្រ័យទាក់ទងគ្នាទៅវិញទៅមក និងទទួលបាននូវភាពសប្បាយរីករាយជាមួយនឹងអាហារ និងភេសជ្ជៈដ៏ឈ្ងុយឆ្ងាញ់ជាមួយគ្នា។ ជារួម កម្មវិធីនេះបានបញ្ចប់ទៅដោយជោគជ័យ និងជាទីមោទក។
ក្រុមហ៊ុន ខេមបូឌាន ដេរីវ៉េទីវ អ៊ិចឆេង មានសោមនស្សដែលបានចូលរួមក្នុងកម្មវិធីដ៏អស្ចារ្យនេះ ពីព្រោះវាដើរតួនាទីយ៉ាងសំខាន់ក្នុងការបង្កើតនូវវេទិការអប់រំដ៏មានតម្លៃ ជាមួយបរិយាកាសរំភើបរីករាយ។ ដូច្នេះហើយទើបក្រុមហ៊ុន ខេមបូឌាន ដេរីវ៉េទីវ អ៊ិចឆេង តែងតែចូលរួម និងផ្តល់ការគាំទ្ររបស់យើងឱ្យបានច្រើនបំផុតតាមដែលអាចធ្វើទៅបាន ក្នុងកិច្ចខិតខំពង្រឹង និងពន្លឿនភាពរីកចម្រើននៃទីផ្សារឧបករណ៍និស្សន្ទនៅកម្ពុជា។