កាលពីថ្ងៃទី២៦ ខែមីនា ឆ្នាំ២០២២ ក្រុមហ៊ុន ខេមបូឌាន ដេរីវ៉េទីវ អ៊ិចឆេង បានធ្វើដំណើរទស្សនកិច្ចនៅ Lukfook Jewellery Cambodia ដែលជាហាងគ្រឿងអលង្ការដ៏ល្បីល្បាញ និងជាប្រេនយីហោមកពីទីក្រុងហុងកុងដំបូងគេនៅក្នុងប្រទេសកម្ពុជា ក្នុងគោលបំណងពិនិត្យលទ្ធភាពនៃកិច្ចសហប្រតិបត្តិការជាដៃគូយុទ្ធសាស្ត្រ ជំរុញភាពរីកចម្រើននៃទីផ្សារលោហធាតុមានតម្លៃ នាំមកនូវអត្ថប្រយោជន៍សម្រាប់អតិថិជន និងធ្វើការរួមគ្នាឆ្ពោះទៅរកអនាគតកាន់តែភ្លឺស្វាង។
ដំណើរទស្សនកិច្ចនេះត្រូវបានដឹកនាំដោយលោក Lawrence Kook ដែលជាអភិបាល និងនាយកប្រតិបត្តិនៃក្រុមហ៊ុន ខេមបូឌាន ដេរីវ៉េទីវ អ៊ិចឆេង ហើយត្រូវបានទទួលស្វាគមន៍យ៉ាងកក់ក្តៅដោយលោកជំទាវ ឆាយ លក្ខិណា អគ្គនាយិកានៃក្រុមហ៊ុន Lukfook Jewellery Cambodia។
លោក Lawrence Kook បានមានប្រសាសន៍ថា៖ «មហាកំពែងដ៏មហិមារបស់ប្រទេសចិន មិនមែនអាចសាងសង់ហើយក្នុងរយៈពេលមួយថ្ងៃ ឬពីរថ្ងៃនោះទេ។ នេះក៏សរបញ្ជាក់ឱ្យឃើញពីសារៈសំខាន់នៃដំណើរទស្សនកិច្ចរបស់យើងក្នុងថ្ងៃនេះ ក្នុងដំណើរឆ្ពោះទៅរកការអភិវឌ្ឍដ៏ធំធេង មិនត្រឹមតែសម្រាប់អត្ថប្រយោជន៍ផ្ទាល់ខ្លួនរបស់យើងប៉ុណ្ណោះទេ ប៉ុន្តែថែមទាំងសម្រាប់អតិថិជន ដៃគូសហការ ក៏ដូចជាឧស្សាហកម្មលោហធាតុមានតម្លៃ និងទីផ្សារឧបករណ៍និស្សន្ទទាំងមូល។ តាមរយៈទស្សនកិច្ចនេះ ខ្ញុំពិតជាចង់ឱ្យមានកិច្ចសហប្រតិបត្តិការជាផ្លូវការជាមួយ Lukfook Jewellery Cambodia នាពេលដ៏ខ្លីខាងមុខ។»
ជាមួយគ្នានេះដែរ លោកជំទាវ ឆាយ លក្ខិណា បានបន្ថែមថា៖ «ក្នុងនាមជាក្រុមហ៊ុនគ្រឿងអលង្ការឈានមុខ Lukfook Jewellery Cambodia ផ្តោតសំខាន់លើការអភិវឌ្ឍខ្លួន ការពង្រីកវិសាលភាពទីផ្សារ និងការផ្ដល់នូវគ្រឿងអលង្ការដែលមានគុណភាពល្អបំផុតដល់អតិថិជន។ កាលពីឆ្នាំមុន យើងបានបើកសម្ពោធហាងទីពីររបស់យើង ដែលមានទំហំ ៩៧ ម៉ែត្រក្រឡានៅខេត្តព្រះសីហនុដែលជាខេត្តកំពុងមានការរីកចម្រើនបំផុតក្នុងប្រទេសកម្ពុជា។ យើងជឿជាក់ថា ផ្លូវល្បឿនលឿនថ្មី និងកំណើនឥតឈប់ឈរនៃអ្នកមកទស្សនាក្នុងខេត្តនេះ ផ្ដល់ឱ្យយើងនូវឱកាសពង្រីកខ្លួនដ៏គួរឱ្យរំភើបរីករាយ។ តាមរយៈកិច្ចខិតខំប្រឹងប្រែងរបស់ក្រុមហ៊ុន ខេមបូឌាន ដេរីវ៉េទីវ អ៊ិចឆេង សម្រាប់ប្រជាជនកម្ពុជា ដែលត្រូវបានឆ្លុះបញ្ចាំងដោយសិក្ខាសាលាតាមបណ្ដាខេត្តក្រុងទាំងអស់នៃប្រទេសកម្ពុជា ពាក់ព័ន្ធនឹងការលើកកម្ពស់លោហធាតុមានតម្លៃ ជាពិសេសមាស យើងពិតជាសាទរ និងស្វាគមន៍រាល់ឱកាសសហការជាមួយពួកគាត់។»
ដំណើរទស្សនកិច្ចនេះបានបញ្ចប់ទៅប្រកបដោយផ្លែផ្កា ដោយភាគីទាំងពីររំពឹងថានឹងមានពិធីចុះហត្ថលេខាលើអនុស្សរណៈនៃការយោគយល់គ្នាក្នុងពេលឆាប់ៗខាងមុខ ដើម្បីពង្រឹង និងចាប់ផ្តើមភាពជាដៃគូជាផ្លូវការ។
en
zh
