កាលពីថ្ងៃទី១៧ ខែតុលា ឆ្នាំ២០១៩ ក្រុមហ៊ុន ខេមបូឌាន ដេរីវ៉េទីវ អ៊ិចឆេង បានសហការជាមួយគណៈកម្មការមូលបត្រកម្ពុជា និងរដ្ឋបាលខេត្តកំពង់ឆ្នាំង រៀបចំសិក្ខាសាលា ដើម្បីចែករំលែកចំណេះដឹង ជំនាញ បទប្បញ្ញាត្តិ ក៏ដូចជាបទពិសោធន៍សម្បូរបែបទាក់ទងនឹងការវិនិយោគរបស់ខ្លួននៅខេត្តកំពង់ឆ្នាំង ដែលជាគោលដៅទី៤នៃសិក្ខាសាលាតាមបណ្ដាខេត្តឆ្នាំ២០១៩ ក្រោមអធិបតីឯកឧត្តម សុខ ដារ៉ា អគ្គនាយករងនៃគណៈកម្មការមូលបត្រកម្ពុជា តំណាងដ៏ខ្ពង់ខ្ពស់ឯកឧត្តម ស៊ូ សុជាតិ អគ្គនាយកនៃគណៈកម្មការមូលបត្រកម្ពុជា និងឯកឧត្តម ស្រ៊ន សំឬទ្ធី អភិបាលរងនៃគណៈអភិបាលខេត្តកំពង់ឆ្នាំង តំណាងដ៏ខ្ពង់ខ្ពស់ឯកឧត្តម ឈួរ ច័ន្ទឌឿន អភិបាលនៃគណៈអភិបាលខេត្តកំពង់ឆ្នាំង។ ជាមួយនឹងប្រធានបទ «អ្វីជាការជួញដូរឧបករណ៍និស្សន្ទ៖ ការត្រៀមខ្លួន ការវិនិយោគ និងការយល់ដឹងពាក់ព័ន្ធ?» សិក្ខាសាលាតាមបណ្ដាខេត្តឆ្នាំ២០១៩ ផ្ដោតសំខាន់ទៅលើការផ្សព្វផ្សាយ និងពង្រីកការយល់ដឹងអំពីការវិនិយោគលើឧបករណ៍និស្សន្ទនៅកម្ពុជា ការវិវត្តនៃទីផ្សារឧបករណ៍និស្សន្ទ ការបង្កើនទំនុកចិត្តរបស់វិនិយោគិន និងការជួយឱ្យវិនិយោគិនមានភាពរួចរាល់ក្នុងការវិនិយោគលើឧបករណ៍និស្សន្ទ ដែលជាផលិតផលហិរញ្ញវត្ថុដ៏ពេញនិយមមួយនៅលើសកលលោក។ សិក្ខាសាលានៅខេត្តកំពង់ឆ្នាំងនេះ បានទាក់ទាញសិក្ខាកាមជាង១៥០នាក់។
ឯកឧត្ដម សុខ ដារ៉ា អគ្គនាយករងនៃគណៈកម្មការមូលបត្រកម្ពុជា បានផ្ដល់កិត្តិយសប្រកាសបើកកម្មវិធីសិក្ខាសាលានៅគោលដៅទី៤ក្នុងឆ្នាំ២០១៩នេះ។ ឯកឧត្ដម បានគូសបញ្ជាក់ពីស្ថានភាពបច្ចុប្បន្ននៃទីផ្សារឧបករណ៍និស្សន្ទនៅក្នុងប្រទេសកម្ពុជា ក៏ដូចជាបេសកកម្មរបស់គណៈកម្មការមូលបត្រកម្ពុជាក្នុងការពង្រឹងបទប្បញ្ញត្តិ គោលការណ៍ការពារវិនិយោគិន និងស្ដង់ដារនៃការអនុវត្តការជួញដូរ។ ជាមួយគ្នានេះដែរ ឯកឧត្ដម បានលើកទឹកចិត្តវិនិយោគិនឱ្យបង្កើនចំណេះដឹង អភិវឌ្ឍខ្លួនឱ្យរួចរាល់ ក៏ដូចជាជ្រើសរើសក្រុមហ៊ុនដែលទទួលបានអាជ្ញាបណ្ណពីគណៈកម្មការមូលបត្រកម្ពុជា ដើម្បីគ្រប់គ្រងហានិភ័យនៅពេលវិនិយោគ។ ឯកឧត្ដម សុខ ដារ៉ា ក៏បានបង្ហាញពីភាពសប្បាយរីករាយក្នុងការសហការជាមួយក្រុមហ៊ុនខេមបូឌាន ដេរីវ៉េទីវ អ៊ិចឆេង ដែលជាក្រុមហ៊ុនសមភាគីកណ្ដាលឈានមុខ និងតែងតែមានភាពសកម្មក្នុងការជំរុញការផ្ដល់ចំណេះជំនាញវិនិយោគដល់សាធារណៈជនកម្ពុជា និងលើកមុខមាត់ប្រទេសកម្ពុជានៅលើឆាកអន្តរជាតិ។
លោក Lawrence Kook អភិបាលនៃ ក្រុមហ៊ុន ខេមបូឌាន ដេរីវ៉េទីវ អ៊ិចឆេង បានបង្ហាញពីក្ដីសង្ឃឹម និងសុទិដ្ធិនិយមទៅលើសិក្ខាសាលាតាមបណ្ដាខេត្ត និងជឿជាក់ថា វានឹងក្លាយជាទុនដ៏សំខាន់សម្រាប់វិនិយោគិនក្នុងការវិនិយោគលើផលិតផលឧបករណ៍និស្សន្ទ។ លោក Lawrence Kook ក៏បានប្ដេជ្ញាអភិវឌ្ឍទីផ្សារឧបករណ៍និស្សន្ទនៅកម្ពុជាឱ្យកាន់តែមានភាពល្អប្រសើរ តាមរយៈការនាំមកនូវបច្ចេកវិទ្យាទំនើបចុងក្រោយ កម្មវិធីជួញដូរប្រកបដោយភាពរលូននិងតម្លាភាព ភាពសម្បូរបែបនៃផលិតផលជួញដូរ គោលការណ៍ការពារវិនិយោគិនប្រកបដោយប្រសិទ្ធភាព គុណភាពនៃសេវាកម្ម ការបណ្ដុះបណ្ដាលផ្ដល់ចំណេះដឹងនិងជំនាញ ការបង្ហាញឱកាសវិនិយោគល្អៗ និងការបង្កើនតួអង្គក្នុងទីផ្សារជាដើម។
ស្របជាមួយគ្នានេះដែរ ឯកឧត្តម ស្រ៊ន សំឬទ្ធី បានផ្ដល់កិត្តិយសថ្លែងបិទកម្មវិធីសិក្ខាសាលានៅខេត្តកំពង់ឆ្នាំង និងបានអរគុណដល់គណៈកម្មការមូលបត្រកម្ពុជា និងក្រុមហ៊ុន ខេមបូឌាន ដេរីវ៉េទីវ អ៊ិចឆេង ដែលបាននាំយកសិក្ខាសាលាផ្ដល់ចំណេះដឹងទាក់ទងនឹងការវិនិយោគដល់ប្រជាជននៅក្នុងខេត្តមួយនេះ។ ឯកឧត្តម ក៏បានរំលឹកសិក្ខាកាមឱ្យវិនិយោគជាមួយតែក្រុមហ៊ុនជំនាញ និងអាជ្ញាបណ្ណត្រឹមត្រូវ ដើម្បីបង្ការហានិភ័យ។
គិតមកដល់បច្ចុប្បន្ននេះ ក្រុមហ៊ុន ខេមបូឌាន ដេរីវ៉េទីវ អ៊ិចឆេង និងគណៈកម្មការមូលបត្រកម្ពុជា បានសហការរៀបចំសិក្ខាសាលាជាមួយរដ្ឋបាលខេត្តនៅតាមបណ្ដាខេត្តចំនួន ៩ រួចមកហើយដែលក្នុងនោះរួមមាន៖ ខេត្តព្រះសីហនុ ខេត្តកំពង់ចាម ខេត្តសៀមរាប ខេត្តបន្ទាយមានជ័យ ខេត្តបាត់ដំបង ខេត្តតាកែវ ខេត្តកំពត ខេត្តកែប និងខេត្តកំពង់ឆ្នាំងនេះតែម្ដង។
en
zh
